Friday Pray (diwaca: Jumatan)

   
   Ceritane lagi nang negara jiran kyeh, sing sering gawe geger karo Indonesia. Pas sholat jumat mau cerita udan deres tapi kur pas adzan sampe salam tok. Ajib nemen owh ya...udan kur pas sholat tok, padahal terang nemen sung sak durunge sholat. Pancen tanggane Indonesia kiye dong masalah cuaca kiye rada ekstrim. Sing awite terang laka limang menit be bisa berubah udan deres sung.

   Balik maning cerita sholat jumat, gara2 udan kuwe mau aku dadi kelingan pas sholat jumat nang Semarang. Mbuh gara2 apa bisane aku dadi kelingan maning cerita kiye. Padahal ora nyambung babar blas karo udan mau awan. Sing pada kur waktune tok, pas jumatan. Ceritane aku duwe kanca telu, bocah-bocah kuwe dong pan mangkat jumatan mesti ngenteni khotbah mulai. Dong krungu khotbah nembe mulai pada adus owh. Pokoke adong saben jumatan mesti kaya kuwelah. Soale kadiran masjide perek, kur kacek enem umah dadine kaya kuwe. 

   Lha suatu saat, pas sholat jumat khatibe ora mangkat, trus ora konfirmasi karo pengurus masjide. Khatib cadangane ya pada bae ora mangkat. Bocah-bocah kuwe kan ora pada ngerti ning khotibe laka. Esih nyante-nyante bae owh ning umah. Padahal pengurus masjide keder kelabakan khatibe laka kabeh. Akhire ana pak Kaji sing rada dituwakna ning kono dikon khotbah daning pengurus masjide. Usulane pengurus masjide pak Kaji mei khotbah secuil mbuh apa. Pokoke khotbah eben sholat jumate sah. 

   Pak Kajine akhire mei khotbah owh, tapi khotbahe secuil nemen laka lima menit. Kira-kira khotbahe kaya kiye "Assalamualaikum, dikarenakan khatibnya tidak bisa hadir maka saya gantikan. Rukun Islam itu ada lima perkara, yang pertama syahadat, kedua sholat, ketiga puasa, keempat zakat, dan terakhir haji. Oleh karena itu sebagai umat Islam kita harus melaksanakannya. Wabillahitaufik wal hidayah wassalamualaikum warahmatullahi wabarakatuh." Lha sing geger kuwe sing nang umah, aku ladi pan adus nembe mlebu kamar mandi di gedor-gedor lawange. "Gagian sholat jumate wis pan mulai!" akhire aku ora sida adus, kur njukut wudu tok owh. Sarungan trus mlayu nang mesjid. Aku metu karo sing ngedog-ngedog lawang, sing ngedog lawang wudune nang mesjid. Lha kancane aku sing loro, sing siji nembe mlebu kamar mandi lagi pas tak tinggal. Sing sijine esih udud, jare tah kebelet nguyuh tapi kan kamar mandine esih dienggo.  Akhire sing siji ora melu jumatan sing sijine telat, ketinggalan sak rokaat.

  Kaya kuwe ceritane, angger gawe gemuyu ya alhamdulillah, angger dianggep biasa-biasa bae laka menarike ya ora apa-apa. Aku sih sing penting nulis. Mbokan ana bakat dadi penulis.

Iya apa belih?

Judule Laka

   Pas puasa wingi aku bar lunga sing Semarang, biasa owh numpak sepur kaligung. Kaligung kuwe ana telung kelas sing pertama eksekutif, trus bisnis, sing terakhir ekonomi. Angger numpak eksekutif Tegal - Semarang kena 50 ewu, eksekutif nang kene diaranine kaligung mas, angger bisnis 25 ewu, nang kaligung mas gerbonge eksekutif karo gerbong bisnis. Dadi sing pan nganggo tinggal milih pengen eksekutif apa bisnis angger tempat duduke esih ana. angger ekonomi luwih murah maning kur 15 ewu. Kelas ekonomi murah nemen sung, bayangna bae wis angger ente numpak motor sing irit nemen be Tegal - Semarang bensine enteke sekitar 3 literan, sak liter saiki 4500. Jajal owh pingna telu anjuge 13500, durung kesele. Numpak bis apa maning bis sing ekonomi bae saiki njaluke 28ewu. Bis eksekutif 36 ewu, bis karo sepur waktu sing ditempuh pada bae, mung unggule numpak bis kuwe bisa kapan bae ora dijadwal. Numpak sing pinggir dalan ya langsung ana. Angger sepur tah ana jadwale, angger telat ya ketinggalan. 

   Pas mangkat sing Tegal tah ayem-ayem bae numpak sepur ekonomi, sepi. Trus nyaman jalane ya kepenak. Bar anjug Semarang kan aku nginep owh telung dina nang kancane, tapi dijak balik bareng daning kancane tapi dina ke papat. Akhire ya wis bareng bae lah karo kancane. Pas kuwe seminggu maning bada, dadine nggo jaga-jaga arus mudik mangkat maning stasiune rada diesuki. Sak durunge subuhan langsung owh mangkat maning stasiun Poncol. Kan rancanane subuhan nang kono trus numpak sepur ekonomi sing jam 6. Pas anjug stasiun jebule ana bae sing wis antri. Sekitar enem uwongan lah sing wis antri, padahal lokete durung buka. Aku melu antri owh akhire. Aku takon karo ngarepe aku "sampeyan esuk nemen antrine". Wonge jawab, "iya antisipasi mbokan rame sih." Lagi enak-enak ngobrol jebule ana satpam loro teka, sing siji nempel pengumuman nang kaca loket, sing sijine ngomong maning wong-wong nang antrian "maaf, kereta kaligung ekonomi yang jam 6 dibatalkan." Mangkel nemen belih krungu kaya kuwe, wis sengaja teka esuk-esuk jebule sepure laka. 

   Priben donge sih! 

  Mbokan ana sing pan dolan maning Semarang atawa balik maning Tegal, kyeh tak wei jadwale:

#Sing Tegal (Stasiun Tegal)

Jam 04.40 (Bisnis)

Jam 05.20 (Mas)

Jam 09.30 (Ekonomi)

Jam 13.15 (Bisnis)

Jam 17.10 (Ekonomi)

#Sing Semarang (Stasiun Poncol)

Jam 05.50 (Ekonomi)

Jam 08.35 (Bisnis)

Jam 13.00 (Ekonomi)

Jam 16.30 (Mas)

Jam 17.00 (Bisnis)